འོན་ཀྱང་ལོ་མང་རིང་བཀའ་བརྒྱུད་སྨོན་ལམ་དང་། བཀའ་བརྒྱུད་དགུན་ཆོས། འཕགས་མ་བདེ་བྱེད་མའི་དགུན་ཆོས་སོགས་ལ་ཚོགས་ཞུགས་གནང་མཁན་རྒྱ་བལ་འབྲུག་གསུམ་གྱི་མཁན་པོ་དང་། བླ་མ། གྲྭ་བཙུན་སློབ་གཉེར་བ་རྣམས་སྨོན་ལམ་ཆོས་རའི་རྒྱབ་ཕྱོགས་ཀྱི་གུར་ནང་བཞུགས་དགོས་སྟབས། ཟླ་གྲངས་སོགས་དུས་ཡུན་རིང་ཐུང་ལ་མ་ལྟོས་པར་དགུན་ཁའི་གནམ་གཤིས་གྲང་མོའི་སྐབས་ཧ་ཅང་གྲང་ཞིང་རློན་ཚད་ཆེ་བ་དང་། གནམ་གཤིས་ཚ་བའི་དུས་སུ་ཕྱི་རོལ་ལས་ཀྱང་ཚ་བ་ཆེ་བ། རླུང་འཚུབ་ཀྱིས་དགེ་འདུན་པའི་ཅ་དངོས་ཐོར་འགྲོ་བའི་དཀའ་ངལ་ཡོད། གུར་རྣམས་ལོ་མང་རིང་བེད་སྤྱོད་བཏང་བ་ལ་བརྟེན་ནས་ད་ལྟ་རྙིང་ཟད་དུ་གྱུར་ཡོད།

དེར་བརྟེན་དགེ་འདུན་པ་རྣམས་ཀྱི་འཕྲོད་བསྟེན་དང་ཆོས་ཀྱི་བྱེད་སྒོ་ཁག་ལ་རྒྱབ་སྐྱོར་གྱི་སླད་དུ། སྨོན་ལམ་ཆོས་རའི་རྒྱབ་ཕྱོགས་སུ་གྲྭ་ཤག་གསར་པ་ཞིག་བཞེངས་ཐུབ་ན། དགེ་འདུན་པ་རྣམས་ལ་གནམ་གཤིས་ཚ་གྲང་གི་དཀའ་སྡུག་ལས་སྲུང་སྐྱོབ་དང་། གཙང་སྦྲ་འཕྲོད་བསྟེན་ལ་ཕན་པ། དེ་བཞིན་ལོ་ལྟར་སྨོན་ལམ་ཆོས་རར་མཛད་རིམ་སྣ་མང་ལ་ཚོགས་ཞུགས་གནང་མཁན་གྱི་དགེ་འདུན་པའི་བཞུགས་གནས་སོགས་དགོས་མཁོ་ཆེན་པོ་མཆིས་པར་དམིགས་ནས་གྲྭ་ཤག་བཞེངས་རྒྱུར་གཏན་འཁེལ་བྱུང་ཡོད།